మదనపల్లె, అక్టోబర్ 4: మదనపల్లి టమాటా మార్కెట్లో గత నాలుగు రోజులుగా టమాటా ధరలు దాదాపు నిలకడగా కొనసాగుతున్నాయి. సీజన్ ముగింపు దశకు చేరుకున్నప్పటికీ ప్రతిరోజూ మదనపల్లి మార్కెట్‌కు సుమారు 80 నుంచి 90 టన్నుల టమాటా విక్రయానికి వస్తున్నట్లు వ్యాపార వర్గాలు చెబుతున్నాయి.
మార్కెట్‌కు వచ్చే టమాటాకు అనుగుణంగా వ్యాపారుల కొనుగోలు కొంత తగ్గడంతో నాణ్యమైన టమాటాకు డిమాండ్ పెరిగింది. దీంతో మంచి నాణ్యత కలిగిన టమాటా కిలో గరిష్ఠంగా రూ.40 వరకు ధర పలుకుతోంది. రెండో రకం, నాణ్యత తక్కువగా ఉన్న టమాటా కిలో రూ.20 వరకు విక్రయమవుతోంది.
ఇటీవల కూరగాయల ధరలు పెరుగుతుండటంతో సామాన్య ప్రజలపై ఆర్థిక భారం పెరుగుతోంది. ఇతర కూరగాయలతో పాటు టమాటా ధరలు కూడా పెరగడంతో నిత్యావసర కూరగాయలు కొనుగోలు చేసేందుకు వినియోగదారులు అధిక మొత్తంలో ఖర్చు చేయాల్సి వస్తోంది.
సీజన్ పూర్తయిన తర్వాత కూడా మదనపల్లి మార్కెట్‌కు గణనీయమైన పరిమాణంలో టమాటా వస్తుండటం రైతులు, వ్యాపారులకు కొంత ఊరటనిస్తున్నప్పటికీ, వినియోగదారులకు మాత్రం పెరుగుతున్న కూరగాయల ధరలు ఆందోళన కలిగిస్తున్నాయి.
