మదనపల్లె, అక్టోబర్ 5:
జిల్లాలో ప్రజలకు మరింత మెరుగైన, సమర్థవంతమైన టీకా సేవలు అందించేందుకు జిల్లా టీకాల కేంద్రం (District Vaccination Centre) ఏర్పాటుకు ప్రతిపాదించిన స్థలాన్ని అధికారులతో కలిసి జాయింట్ కలెక్టర్ శివ్ నారాయణ శర్మ పరిశీలించారు.
సోమవారం మదనపల్లెలోని ఇరిగేషన్ ఈఈ కార్యాలయ ప్రాంగణంలో జిల్లా టీకాల కేంద్రం ఏర్పాటుకు ప్రతిపాదించిన స్థలాన్ని డీఎంహెచ్ఓ, మదనపల్లె తహసీల్దార్‌తో కలిసి జేసి పరిశీలించారు. సుమారు 0.07 సెంట్లు (దాదాపు 3,000 చదరపు అడుగులు) విస్తీర్ణంలో ఉన్న స్థలాన్ని కేంద్రం ఏర్పాటుకు అనుకూలతపై పరిశీలించారు.
ఈ సందర్భంగా జాయింట్ కలెక్టర్ మాట్లాడుతూ… జిల్లా స్థాయిలో టీకాల కార్యక్రమాలను మరింత సమర్థవంతంగా నిర్వహించేందుకు ప్రత్యేక టీకాల కేంద్రం ఏర్పాటు చేయడం ద్వారా ప్రజలకు, ముఖ్యంగా చిన్నారులు మరియు ఇతర అవసరమైన వర్గాలకు టీకా సేవలు సులభంగా అందుబాటులోకి వస్తాయని తెలిపారు.
ప్రతిపాదిత స్థలంలో కేంద్రం ఏర్పాటుకు అవసరమైన మౌలిక వసతులు, భవన నిర్మాణానికి అనుకూలత, ప్రజలకు రాకపోకల సౌలభ్యం, ఇతర సదుపాయాలను పరిశీలించారు. సంబంధిత శాఖల అధికారులు సమన్వయంతో తదుపరి చర్యలు చేపట్టాలని జాయింట్ కలెక్టర్ సూచించారు.
ఈ కార్యక్రమంలో డీఎంహెచ్ఓ, మదనపల్లె తహసీల్దార్, వైద్య ఆరోగ్య శాఖ, రెవెన్యూ శాఖకు చెందిన అధికారులు తదితరులు పాల్గొన్నారు.
