భద్రమైన ప్రయాణమే.. జిల్లా యంత్రాంగం లక్ష్యం!

• అన్నమయ్య జిల్లాలో రోడ్డు ప్రమాదాల నివారణపై కలెక్టర్, ఎస్పీ బిగ్ యాక్షన్ ప్లాన్
• బ్లాక్ స్పాట్ల గుర్తింపు, ఆటోలకు ప్రత్యేక స్టాండ్లు, అక్రమ స్పీడ్ బ్రేకర్ల తొలగింపునకు ఆదేశాలు
• ‘రహ్ వీర్’లకు ఆగస్టు 15న సన్మానం

మదనపల్లె (ఆగస్టు 04):( gtvmedia )రోడ్డు ప్రమాదాలకు శాశ్వతంగా చెక్ పెట్టి, ప్రయాణికులు, పాదచారుల ప్రాణాలను కాపాడటమే ప్రధాన లక్ష్యంగా అన్నమయ్య జిల్లా యంత్రాంగం సమగ్ర ప్రణాళికతో రంగంలోకి దిగింది. మంగళవారం మదనపల్లె కలెక్టరేట్ వేదికగా జిల్లా రోడ్డు భద్రతా కమిటీ (DRSC) ఉన్నత స్థాయి సమీక్షా సమావేశం అత్యంత ప్రాధాన్యత సంతరించుకుంది. ఈ సమావేశానికి జిల్లా ఇన్‌చార్జి కలెక్టర్ శ్రీ శివ్ నారాయణ శర్మ, IAS, జిల్లా ఎస్పీ శ్రీ ధీరజ్ కునుబిల్లి, IPS హాజరై, క్షేత్రస్థాయిలో రహదారి భద్రతా చర్యలపై వివిధ శాఖల అధికారులకు స్పష్టమైన దిశానిర్దేశం చేశారు.

ప్రమాదాల నివారణకు కలెక్టర్ మాస్టర్ ప్లాన్:

సమావేశంలో కలెక్టర్ శివ్ నారాయణ శర్మ మాట్లాడుతూ, క్షేత్రస్థాయిలో భద్రతా చర్యలు తక్షణమే అమలు కావాలని స్పష్టం చేశారు.

• జీబ్రా క్రాసింగ్స్ & డస్ట్ క్లీనింగ్: పాఠశాలలు, కళాశాలలు, రద్దీ ప్రాంతాల వద్ద పాదచారుల రక్షణకు జీబ్రా క్రాసింగ్‌లను ఏర్పాటు చేయాలని ఆదేశించారు. నేషనల్ హైవేలపై దుమ్ము, ధూళిని ఎప్పటికప్పుడు తొలగించడంతో పాటు సరిగా వీధి దీపాలు వెలిగేలా చూడాలన్నారు.
• బ్లాక్ స్పాట్స్ తనిఖీ: ప్రమాదాలు ఎక్కువగా జరుగుతున్న ‘బ్లాక్ స్పాట్స్’ వద్ద అన్ని శాఖల అధికారులు సంయుక్త తనిఖీలు చేసి, తక్షణమే రక్షణ చర్యలు చేపట్టాలని సూచించారు.
• ట్రామా కేర్ & రెస్ట్ ఏరియాలు: జిల్లాలో ప్రమాద బాధితులకు తక్షణ వైద్యం అందించేందుకు ప్రత్యేక ‘ట్రామా కేర్ సెంటర్’ ఏర్పాటుకు ప్రతిపాదనలు సిద్ధం చేయాలని, హైవేలపై వాహనదారుల విశ్రాంతి కోసం కనీస సౌకర్యాలతో రెస్ట్ సెంటర్లు ఏర్పాటు చేయాలని చెప్పారు.
• ‘రహ్ వీర్’లకు పురస్కారం: రోడ్డు ప్రమాద బాధితులను సకాలంలో ఆస్పత్రికి చేర్చి ప్రాణాలు కాపాడే ఉత్తమ పౌరులను (రహ్ వీర్లు) గుర్తించి, వస్తున్న ఆగస్టు 15 స్వాతంత్ర్య దినోత్సవ వేడుకల్లో సత్కరించనున్నట్లు వెల్లడించారు.

రాత్రి వేళ కఠిన నిఘా.. అనవసర స్పీడ్ బ్రేకర్ల తొలగింపు: ఎస్పీ ధీరజ్ కునుబిల్లి

జిల్లా ఎస్పీ ధీరజ్ కునుబిల్లి మాట్లాడుతూ, ట్రాఫిక్ నిబంధనల అమలులో ఎలాంటి ఉపేక్ష లేదని స్పష్టం చేశారు.

• సాయంత్రం 6 నుండి 9 వరకు హై అలర్ట్: సాయంత్రం 6:00 నుంచి రాత్రి 9:00 గంటల మధ్య ప్రమాదాలు ఎక్కువగా జరుగుతున్నట్లు గణాంకాలు తెలుపుతున్నాయని, ఈ సమయంలో పోలీస్ నిఘా, వాహన తనిఖీలు తీవ్రతరం చేస్తామన్నారు.
• రేడియం రిఫ్లెక్టర్లు: రాత్రి వేళల్లో వ్యవసాయ ట్రాక్టర్లు, పశువుల వల్ల జరిగే ప్రమాదాలను అరికట్టేందుకు వాటికి రేడియం రిఫ్లెక్టర్లు, రిఫ్లెక్టివ్ కాలర్ టేపులు తప్పనిసరిగా కట్టాలని ఆదేశించారు.
• స్పీడ్ బ్రేకర్లు & ఆటో స్టాండ్లు: మదనపల్లె పట్టణంలో నిబంధనలకు విరుద్ధంగా, వాహనదారులకు ఇబ్బందిగా మారిన అనవసర స్పీడ్ బ్రేకర్లను తక్షణమే తొలగించాలని, పట్టణంలో ఆటోల నిలుపుదలకు ప్రత్యేక స్థలాలను కేటాయించి ట్రాఫిక్ చిక్కులు లేకుండా చూడాలని ఆదేశించారు.

పథకాలపై సమగ్ర అవగాహన:

జిల్లా అదనపు ఎస్పీ (పరిపాలన) ఎం. వెంకటాద్రి గారు సమావేశంలో మాట్లాడుతూ క్షతగాత్రులను రక్షించే ‘రహ్ వీర్’, ‘పీఎం రాహత్’ పథకాల మార్గదర్శకాలను అధికారులకు వివరించారు.

ఈ కార్యక్రమంలో మదనపల్లె మున్సిపల్ కమిషనర్, రాయచోటి డీఎస్పీ ఎం.ఆర్. కృష్ణమోహన్, రవాణా, వైద్య ఆరోగ్య, పంచాయతీ రాజ్, జాతీయ రహదారుల సంస్థ అధికారులు మరియు మదనపల్లె, రాయచోటి ట్రాఫిక్ సీఐలు పాల్గొన్నారు.