మదనపల్లె, అక్టోబర్ 28:
మదనపల్లె మున్సిపల్ ఎన్నికల ప్రచారంలో భాగంగా పట్టణంలోని 2, 16, 18వ వార్డుల్లో గౌరవ ఎమ్మెల్యే ఎం. షాజహాన్ భాషా కూటమి అభ్యర్థులతో కలిసి ఇంటింటి ప్రచారం నిర్వహించారు. ఈ సందర్భంగా స్థానిక ప్రజలను కలుసుకుని కూటమి అభ్యర్థులకు మద్దతు తెలపాలని కోరారు.
ప్రచారంలో భాగంగా ఎమ్మెల్యే షాజహాన్ భాషా మాట్లాడుతూ, కూటమి ప్రభుత్వం చేపడుతున్న అభివృద్ధి కార్యక్రమాలను ప్రజలకు వివరించారు. మదనపల్లె పట్టణ అభివృద్ధికి మరింత ప్రాధాన్యత ఇస్తామని, ప్రజలకు మెరుగైన రహదారులు, డ్రైనేజీ వ్యవస్థ, తాగునీటి సౌకర్యాలు కల్పించేందుకు కృషి చేస్తామని తెలిపారు.
ప్రజలు ఎదుర్కొంటున్న సమస్యలను గుర్తించి, వాటి పరిష్కారానికి కట్టుబడి ఉంటామని పేర్కొన్నారు. పట్టణాన్ని అన్ని రంగాల్లో అభివృద్ధి చేసేందుకు ప్రజాప్రతినిధులు, ప్రజల సహకారంతో సమిష్టిగా పనిచేస్తామని ఎమ్మెల్యే వెల్లడించారు.
