జనరల్‌ కేటగిరీకి కేటాయింపు.. జెడ్పీ పీఠంపై రాజకీయ వర్గాల్లో ఆసక్తి
మదనపల్లె, Gtvmedia : రాష్ట్రంలో త్వరలో జరగనున్న రెండో సాధారణ పంచాయతీరాజ్‌ ఎన్నికలు–2026 నేపథ్యంలో జిల్లా ప్రజా పరిషత్‌ (జెడ్పీ) చైర్మన్‌ పదవుల రిజర్వేషన్లను ప్రభుత్వం ఖరారు చేసింది. ఈ మేరకు పంచాయతీరాజ్‌, గ్రామీణాభివృద్ధి శాఖ కమిషనర్‌ వి.ఆర్‌.కె. తేజ మైలవరపు మంగళవారం గెజిట్‌ నోటిఫికేషన్‌ విడుదల చేశారు.
ఈ నోటిఫికేషన్‌ ప్రకారం అన్నమయ్య జిల్లా పరిషత్‌ చైర్మన్‌ స్థానం అన్‌రిజర్వ్‌డ్‌ (జనరల్‌) కేటగిరీకి కేటాయించారు. దీంతో ఈ పదవికి పోటీ చేసే అభ్యర్థుల ఎంపిక, రాజకీయ పార్టీల వ్యూహాలపై ఆసక్తి నెలకొంది.
జెడ్పీ చైర్మన్‌ పదవి కీలకంగా మారడంతో ప్రధాన రాజకీయ పార్టీలు తమ బలాబలాలను అంచనా వేసుకుంటూ, అనుకూల అభ్యర్థుల ఎంపికపై దృష్టి సారించే అవకాశం ఉంది. ఆశావహులు సైతం తమ రాజకీయ భవిష్యత్తుపై లెక్కలు వేసుకుంటున్నారు. జిల్లాలోని మండలాలు, గ్రామీణ ప్రాంతాల్లో పార్టీ బలాన్ని పెంచుకోవడంపై రాజకీయ పార్టీలు దృష్టి సారించనున్నాయి.
రాష్ట్రవ్యాప్తంగా జిల్లా ప్రజా పరిషత్‌ చైర్మన్‌ పదవులకు సంబంధించి ఎస్సీ, ఎస్టీ, బీసీ, మహిళా రిజర్వేషన్ల వివరాలను ప్రభుత్వం గెజిట్‌లో పొందుపరిచింది. కొత్తగా ఏర్పాటైన 28 జిల్లా పరిషత్‌లకు ఈ రిజర్వేషన్లు వర్తించనున్నట్లు నోటిఫికేషన్‌లో పేర్కొన్నారు.
అన్నమయ్య జిల్లా జెడ్పీ చైర్మన్‌ స్థానం జనరల్‌ కేటగిరీకి కేటాయించడంతో, రాబోయే ఎన్నికల్లో ఈ పదవిని ఏ పార్టీ దక్కించుకుంటుంది? చైర్మన్‌ అభ్యర్థిగా ఎవరిని ఎంపిక చేస్తారు? అనే అంశాలు రాజకీయ వర్గాల్లో చర్చనీయాంశంగా మారాయి. ఎన్నికల ప్రక్రియ ముందుకు సాగుతున్న కొద్దీ జిల్లాలో రాజకీయ సమీకరణాలు మరింత ఆసక్తికరంగా మారే అవకాశముంది.
