100 శాతం స్ట్రైక్ రేట్ సాధించడమే లక్ష్యం: రాయలసీమ కో-కన్వీనర్ రాందాస్ చౌదరి
మదనపల్లె, అక్టోబర్ 10: రాబోయే స్థానిక సంస్థల ఎన్నికల్లో జనసేన పార్టీకి కేటాయించిన స్థానాల్లో విజయం సాధించడమే లక్ష్యంగా పార్టీ శ్రేణులు సమష్టిగా పనిచేయాలని జనసేన పార్టీ రాయలసీమ కో-కన్వీనర్ రాందాస్ చౌదరి పిలుపునిచ్చారు. మున్సిపల్, జెడ్పీటీసీ, ఎంపీటీసీ, సర్పంచ్ ఎన్నికల్లో కూటమి అభ్యర్థుల విజయానికి కృషి చేయాలని సూచించారు.
శనివారం మదనపల్లెలో నిర్వహించిన విలేకరుల సమావేశంలో ఆయన మాట్లాడుతూ, గత సార్వత్రిక ఎన్నికల్లో జనసేన పార్టీ 100 శాతం స్ట్రైక్ రేట్ సాధించిందని గుర్తుచేశారు. పార్టీ అధినేత పవన్ కళ్యాణ్ మార్గనిర్దేశంలో అదే స్ఫూర్తితో రాబోయే స్థానిక సంస్థల ఎన్నికలకు సిద్ధమవుతున్నట్లు తెలిపారు.
రాజంపేట పార్లమెంట్ పరిధిలో పార్టీని క్షేత్రస్థాయిలో బలోపేతం చేసేందుకు అబ్జర్వర్లు, సమన్వయ కమిటీలు, సబ్‌కమిటీలను నియమించినట్లు వెల్లడించారు. నాయకులు, కార్యకర్తల మధ్య సమన్వయాన్ని పెంచుతూ, ప్రభుత్వ సంక్షేమ కార్యక్రమాలను ప్రజల్లోకి తీసుకెళ్లాలని సూచించారు.
కూటమిలో జనసేన పార్టీకి కేటాయించే ప్రతి స్థానంలో విజయం సాధించేందుకు స్థానిక పరిస్థితులను అర్థం చేసుకోవాలని, ప్రజా సమస్యలపై నిరంతరం స్పందిస్తూ పార్టీ బలోపేతానికి కృషి చేయాలని కోరారు.
వైఎస్సార్‌సీపీ ప్రభుత్వ హయాంలో అవినీతి, అరాచక పాలన చోటుచేసుకున్నాయని ఆయన ఆరోపించారు. రాష్ట్రంలో అభివృద్ధి, సంక్షేమ కార్యక్రమాలు కొనసాగేందుకు కూటమి ప్రభుత్వం చేపడుతున్న కార్యక్రమాలకు ప్రజల మద్దతు అవసరమని పేర్కొన్నారు. స్థానిక సంస్థల ఎన్నికల్లో పార్టీ శ్రేణులు ఐక్యంగా పనిచేసి, ప్రజలతో మమేకమై పార్టీ సిద్ధాంతాలను విస్తృతంగా ప్రజల్లోకి తీసుకెళ్లాలని పిలుపునిచ్చారు.
ఈ సమావేశంలో మార్కెట్ యార్డ్ కమిటీ చైర్మన్ జంగాల శివరాం, ఏఎంసీ డైరెక్టర్ లక్ష్మీపతి, పార్లమెంట్ కమిటీ సభ్యుడు ప్రదీప్ సింగ్, సపోర్ట్ టీం సభ్యుడు అడపా సురేంద్ర, బీసీ నాయకులు బండి మనోహర్, జయ భవ్యతో పాటు పలువురు జనసేన నాయకులు, కార్యకర్తలు పాల్గొన్నారు.
