డ్రోన్ కెమెరాలతో పోలీసుల నిరంతర నిఘా.. శాంతిభద్రతలకు విఘాతం కలిగిస్తే కఠిన చర్యలు
మదనపల్లె, అక్టోబర్ 18: మున్సిపల్ ఎన్నికల నామినేషన్ల ముగింపు నేపథ్యంలో మదనపల్లెలో పోలీసులు భారీ బందోబస్తు ఏర్పాటు చేశారు. జిల్లా ఎస్పీ శ్రీ ధీరజ్ కునుబిల్లి, ఐపీఎస్, ఆదేశాల మేరకు పట్టణంలోని దొంతి వీధిలో ఉన్న నామినేషన్ కేంద్రం వద్ద పటిష్ట భద్రతా చర్యలు చేపట్టారు.
డీఎస్పీ వంశీధర్ గౌడ్ ఆధ్వర్యంలో సీఐలు, ఎస్‌ఐలు, స్థానిక పోలీసులతో పాటు ఏఆర్, స్పెషల్ పార్టీ బలగాలను మోహరించారు. నామినేషన్ల ప్రక్రియ ప్రశాంతంగా, ఎలాంటి అవాంఛనీయ ఘటనలకు తావులేకుండా సాగేందుకు పోలీసులు ప్రత్యేక చర్యలు తీసుకున్నారు.
నామినేషన్ కేంద్రం పరిసర ప్రాంతాల్లో డ్రోన్ కెమెరాల ద్వారా నిరంతరం నిఘా కొనసాగిస్తున్నారు. ఎలాంటి అవాంఛనీయ ఘటనలు చోటుచేసుకోకుండా ముందస్తు జాగ్రత్తలు చేపట్టారు.
శాంతిభద్రతలకు విఘాతం కలిగించే చర్యలకు పాల్పడితే ఎంతటి వారినైనా ఉపేక్షించేది లేదని, నిబంధనలు ఉల్లంఘించిన వారిపై చట్టప్రకారం కఠిన చర్యలు తీసుకుంటామని పోలీసు అధికారులు హెచ్చరించారు.
