ఐదు నియోజకవర్గాల ఇంచార్జ్‌లు, పీఓసీలతో స్టేట్ కమిటీ సమావేశం
తిరుపతి, సెప్టెంబర్ 28: అన్నమయ్య జిల్లాలో రానున్న స్థానిక సంస్థల ఎన్నికల నేపథ్యంలో రాజకీయ సమీకరణాలు, నియోజకవర్గాల వారీగా పార్టీ పరిస్థితులపై చర్చ జరిగింది. తిరుపతిలోని లెమన్ ట్రీ హోటల్‌లో ఎన్నికల స్టేట్ కమిటీ సభ్యుడు యనమల భాస్కర్తో అన్నమయ్య జిల్లాకు చెందిన నియోజకవర్గాల ఇంచార్జ్‌లు, పీఓసీలు సమావేశమయ్యారు.
ఈ సమావేశానికి రాయలసీమ కో-కన్వీనర్, మదనపల్లి నియోజకవర్గ ఇంచార్జి గంగారపు రాందాస్ చౌదరి, పీలేరు నియోజకవర్గ ఇంచార్జి బెజవాడ దినేష్, పుంగనూరు నియోజకవర్గ పీఓసీ సిరివేలు గంగాధర్, తంబళ్లపల్లె నియోజకవర్గ పీఓసీ పోతుల సాయినాథ్, మదనపల్లి ఏఎంసీ చైర్మన్ జంగాల శివరామ్ రాయల్ తదితరులు పాల్గొన్నారు.
సమావేశంలో అన్నమయ్య జిల్లాలోని ఐదు నియోజకవర్గాల పరిధిలో స్థానిక సంస్థల ఎన్నికలకు సంబంధించిన అంశాలపై చర్చించినట్లు సమాచారం. గ్రామీణ, పట్టణ ప్రాంతాల్లో పార్టీ పరంగా చేపట్టాల్సిన కార్యక్రమాలు, స్థానిక రాజకీయ పరిస్థితులు, ఎన్నికల సన్నద్ధత తదితర అంశాలను నియోజకవర్గాల వారీగా సమీక్షించినట్లు తెలిపారు.
ముఖ్యంగా మున్సిపల్ ఎన్నికలపై ప్రత్యేకంగా చర్చ జరిగినట్లు పేర్కొన్నారు. మున్సిపాలిటీల్లో ప్రస్తుత రాజకీయ పరిస్థితులు, స్థానిక స్థాయిలో పార్టీ బలాబలాలు, ఎన్నికల సమయంలో ఎదురయ్యే అంశాలు, క్షేత్రస్థాయిలో పార్టీ కార్యకర్తల సమన్వయం వంటి విషయాలపై సమావేశంలో చర్చించినట్లు సమాచారం.
అలాగే ఆయా నియోజకవర్గాల్లో జనసేన పార్టీ బలాబలాలు, స్థానిక రాజకీయ సమీకరణాలు తదితర అంశాలను కూడా సమావేశంలో ప్రస్తావించినట్లు తెలిసింది.
రానున్న స్థానిక సంస్థల ఎన్నికలను దృష్టిలో ఉంచుకుని నియోజకవర్గాల వారీగా పరిస్థితులను అంచనా వేయడం, క్షేత్రస్థాయిలో పార్టీ శ్రేణులను సమన్వయం చేయడం, ఎన్నికల సన్నద్ధతను బలోపేతం చేయడంపై సమావేశంలో ప్రధానంగా దృష్టి సారించినట్లు సమాచారం.
