డీలిమిటేషన్తో 35 నుంచి 48కు పెరిగిన వార్డులు.. 1,16,958 మంది ఓటర్లు
పురుషుల కంటే మహిళా ఓటర్లే అధికం.. సవరణలకు ఫారం–8, కొత్త నమోదుకు ఫారం–6
అన్నమయ్య జిల్లా | మదనపల్లె | GTV Media
మదనపల్లె పురపాలక సంఘంలో వార్డుల పునర్విభజన (డీలిమిటేషన్) ప్రక్రియ పూర్తయింది. దీంతో గతంలో ఉన్న 35 వార్డుల సంఖ్య 48కి పెరిగింది. ఈ నేపథ్యంలో 48 వార్డులకు సంబంధించిన ముసాయిదా ఓటర్ల జాబితాను మున్సిపల్ కమిషనర్ ప్రమీల విడుదల చేశారు.
రాష్ట్ర ఎన్నికల సంఘం (SEC), పురపాలక పరిపాలన శాఖ (CDMA) మార్గదర్శకాల మేరకు 01–01–2026 అర్హత తేదీగా తీసుకుని 164–మదనపల్లె అసెంబ్లీ నియోజకవర్గ పరిధిలోని అర్బన్ పోలింగ్ కేంద్రాల ఆధారంగా 48 వార్డులకు ఎలక్టోరల్ రోల్ రూపొందించినట్లు అధికారులు తెలిపారు.
48 వార్డుల్లో 1,16,958 మంది ఓటర్లు
మదనపల్లె మున్సిపాలిటీ పరిధిలోని 48 వార్డుల్లో మొత్తం 1,16,958 మంది ఓటర్లు ఉన్నారు. వీరిలో 56,862 మంది పురుషులు, 60,083 మంది మహిళలు, 13 మంది ఇతర ఓటర్లు ఉన్నట్లు వెల్లడించారు.
పురుష ఓటర్లతో పోలిస్తే మహిళా ఓటర్లు 3,221 మంది అధికంగా ఉన్నారు.
ప్రజల పరిశీలనకు ఓటర్ల జాబితాలు
ముసాయిదా ఓటర్ల జాబితాలను ప్రజల పరిశీలన కోసం మున్సిపల్ కార్యాలయం, తహసీల్దార్ కార్యాలయం, సబ్కలెక్టర్ కార్యాలయం, కలెక్టరేట్లో అందుబాటులో ఉంచారు.
గుర్తింపు పొందిన రాజకీయ పార్టీల ప్రతినిధులకు కూడా ఓటర్ల జాబితా ప్రతులను అందజేస్తున్నట్లు అధికారులు తెలిపారు.
అసెంబ్లీ నియోజకవర్గ ఓటర్ల జాబితాలో పేరు ఉన్న ప్రతి ఓటరు పేరు సంబంధిత మున్సిపల్ వార్డు ఓటర్ల జాబితాలోనూ ఉంటుందని స్పష్టం చేశారు.
వివరాల్లో మార్పులకు ఫారం–8
ఓటర్ల జాబితాలో పేరు, వయస్సు, చిరునామా, డోర్ నంబర్ తదితర వివరాల్లో తప్పులు లేదా మార్పులు ఉంటే ఫారం–8 ద్వారా సవరణకు దరఖాస్తు చేసుకోవచ్చు.
మున్సిపల్ కార్యాలయంలో నేరుగా వివరాలను సవరించే అవకాశం ఉండదని, ఎన్నికల సంఘం నిబంధనల ప్రకారం సంబంధిత ఓటర్లు ఆన్లైన్లో ఫారం–8 ద్వారా దరఖాస్తు చేసుకోవాలని అధికారులు సూచించారు.
కొత్తగా ఓటు నమోదు కోసం ఫారం–6
ఇప్పటివరకు ఓటరుగా నమోదు కాని అర్హులు ఫారం–6 ద్వారా ఆన్లైన్లో దరఖాస్తు చేసుకోవచ్చు. సంబంధిత ఈఆర్వో దరఖాస్తును పరిశీలించి ఆమోదించిన అనంతరం ఎన్నికల సంఘం నిబంధనల మేరకు కొత్త పేర్లను సప్లిమెంటరీ ఓటర్ల జాబితాలో చేర్చనున్నట్లు అధికారులు తెలిపారు.
మదనపల్లె మున్సిపాలిటీలో వార్డుల సంఖ్య 35 నుంచి 48కి పెరగడంతో పాటు మొత్తం ఓటర్ల సంఖ్య 1.17 లక్షలకు చేరడం, అందులో మహిళా ఓటర్లు అధికంగా ఉండటం ప్రాధాన్యత సంతరించుకుంది.
